Farið að þroskast!

Ég er orðinn leiður á því að láta tvíokunarfélög á borð við Símann og OgVodafone hafa mig og aðra neytendur að fíflum. Félögin bítast um jafn sjálfsagða þjónustu og neyðarstaðsetningu á farsímum og talast við með fréttatilkynningum. Þetta kemur í kjölfar þess að sjónvarpshluti þessara sömu fyrirtækja hefur reynt að nappa áhorfendum frá hinum aðilanum með einangrunarstefnu í afruglurum og ADSL mótöldum. Aðfarirnar eru ósvífnar, sjálfselskar og markaðsskemmandi og eru báðum aðilum til vansa.
Á meðan Fjarskiptastofnun eltir litla krakka með labb-rabb tæki eða Ipod notendur með skammdræga útvarpssenda komast þessi félög upp með að hringla í íslenskum neytendum þeim til mikils ama og óþarfa kostnaðar.
Ég geri þá kröfu að félög sem fá afhentar þær auðlindir sem þessu félög hafa fengið að byggja upp umgangist þær af ábyrgð og þroska. Það gera þau ekki núna.
Ef það væri einhver döngun í Fjarskiptastofnun og Samkeppnisstofnun ættu þær að gera nokkrar kröfur: (þetta er enn á hugmyndastiginu)
1. Digital Ísland yrði tekið af 365 með vænni greiðslu og sett í óháð félag sem hefði það hlutverk að dreifa örbylgjumerki um afruglarakerfi til allra Íslendinga, ekki ósvipað og rafmagnsveitur sjá um að línur liggi til allra heimila í landinu.
2. Breiðband Landssímans væri tekið af Símanum og sett í sama eða svipað félag.
3. Bannað væri að sami aðili ætti meirihluta í einhverri skilgreindri dreifileið, gagnvirkri eða ekki, og væri jafnframt efnisveita eða framleiðandi.
4. Ef þú átt einkarétt á vinsælu efni máttu ekki þvinga menn til viðskipta við þig um dreifileið eða óskylda hluti eins Síminn neyðir ADSL upp á menn sem vilja enska boltann. Komm on! þarf ég að skrifa þetta? Árið er 2005 og Síminn kemst upp með að neyða þann sem vill leigja videó að kaupa líka popp og kók þó hann langi ekkert í það. Þessi líking dugir ekki einu sinni til, þetta er svo fáránlegt set up hjá Símanum.

Þetta er nóg af tuði í dag.
Jákvæðni dagsins er eftirfarandi:
Skrifstofan mín veitir mér útsýni yfir Esjuna og sundin blá.
Heimili mitt veitir mér útsýni yfir Álftanes, Keili, Reykjanes og hafið bláa hafið.
Þetta er pottþétt samsetning og merkilegt að maður komi einhverju í verk. Geri það samt.

Mér sýnist verða háflóð í Reykjavík mánudaginn 19. sept. nema það aukist enn eftir þann dag. Þetta hugsaði ég aldrei um áður en ég flutti í Sörlaskjól.